კისრის ტკივილს ბევრი ადამიანი უჩივის.
ამ დისკომფორტის მიზეზი შესაძლოა იყოს კუნთის დაჭიმულობა, ნერვის კომპრესია, სახსრების გაცვეთა, ტრავმა ან ზოგიერთი დაავადება. კისრის კუნთები შესაძლოა დაიჭიმოს ცუდი პოზის ან მკვეთრი მოძრაობის გამო.
კისრის ტკივილთან ერთად ადამიანი ხშირად უჩივის კუნთის დაჭიმულობასა და სპაზმს, უჭირს თავის მოძრაობა და სხეულის მდგომარეობის შეცვლა, შეიძლება კისრის არეში დაჭიმულობას თან ახლდეს თავის ტკივილიც.
როგორც წესი, კლინიკურ შემთხვევათა დიდ პროცენტში კისრის ტკივილი სახლის პირობებში მკურნალობას ექვემდებარება და პაციენტის მდგომარეობა საშუალოდ 2-3 კვირაში უმჯობესდება.
თუმცა იმ შემთხვევაში, როდესაც კისრის ტკივილი მწვავეა და დისკომფორტი ქრონიკულ სახეს იძენს, შესაბამისი სპეციალისტის დახმარებაა საჭირო - ექიმი დიაგნოსტირების საფუძველზე დანიშნავს ადეკვატური მკურნალობის კურსს.
გაითვალისწინეთ, პაციენტი აუცილებლად უნდა მოთავსდეს კლინიკაში და გამოიძახოთ გადაუდებელი სასწრაფო დახმარება თუ კისრის ტკივილის გამომწვევი მიზეზია ტრავმა (ავარია ან დაცემა, წაქცევა, სიმაღლიდან ჩამოვარდნა).
ასევე აუცილებლად გაიარეთ ექიმის კონსულტაცია შემდეგი მდგომარეობის დროს:
- კისრის ტკივილი არის მწვავე და სიმპტომი არ ალაგდა რამდენიმე დღის განმავლობაში;
- ტკივილი ვრცელდება ზედა და ქვედა კიდურებში;
- კისრის ტკივილთან ერთად გრძნობთ დაბუჟებას, სისუსტეს, ჩხვლეტას ან უჩივით თავის ტკივილს.
პრევენცია
კისრის ტკივილის პრევენციისთვის რეკომენდებულია:
- ყოველთვის აკონტროლეთ სხეულის პოზა, სხეულის მდგომარეობა;
- მნიშვნელობა არ აქვს რას აკეთებთ, შესვენება ყველა ადამიანისთვის აუცილებელია. მაგალითად, თუ კომპიუტერთან მუშაობთ, ხშირად ადექით ფეხზე და თუნდაც ოთახში რამდენიმე წუთით გაიარეთ;
- კომფორტულად მუშაობა რომ შეძლოთ, ყოველთვის სხეულის პოზის შესაბამისად გაასწორეთ სკამი, მაგიდა თუ კომპიუტერის ეკრანი;
- შეიძლება ამაზე არც კი დაფიქრებულხართ - როდესაც საუბრობთ, მობილურს ყურსა და მხარს შორის იქცევთ (ანუ თავს ზედმეტად გვერდით ხრით და მხარს მაღლა სწევთ მობილური ძირს რომ არ დავარდეს)? სწორედ მსგავსი უხერხული მოძრაობები ზრდის კისრის ტკივილის განვითარების რისკს;
- თამბაქოზე უარის თქმა მოგიწევთ;
- შეეცადეთ დღის მანძილზე თავი უმეტესად „ნეიტრალურ“ პოზაში გქონდეთ (მოერიდეთ მკვეთრ მოძრაობებს);
- მოერიდეთ საწოლში კითხვას;
- არასასურველია მუცელზე (პირქვე) ძილი;
- უნდა შეარჩიოთ კომფორტული და ისეთი ზომის ბალიში, რომლის გამოც ძილში კისერი ბუნებრივ პოზას არ დაკარგავს;
- მძიმე ჩანთა არასდროს გადაიკიდოთ ერთ მხარზე (თუ შესაძლებელია ტვირთი თანაბრად გადაანაწილეთ).
წყარო:
https://www.mayoclinic.org/diseases-conditions/neck-pain/symptoms-causes/syc-20375581
