მეცნიერები სტრეპტოკოკურ ინფექციას უწოდებენ ინფექციას, რომელიც სტრეპტოკოკის ჯგუფის ბაქტერიითაა გამოწვეული.
სტატიაში B ჯგუფის სტრეპტოკოკზე მოგითხრობთ.
B ჯგუფის სტრეპტოკოკი გავრცელებული ბაქტერიაა, რომელიც ნაწლავებსა და გენიტალური ტრაქტის ქვედა ნაწილში გვხვდება.
ჩვეულებრივ, ჯანმრთელ ზრდასრულებში ბაქტერია უვნებელია, თუმცა ახალშობილებში ბაქტერიამ შესაძლოა გამოიწვიოს სერიოზული დაავადება სახელწოდებით B ჯგუფის სტრეპტოკოკული დაავადება. ეს ბაქტერია ვნებს იმ ზრდასრული ადამიანის ორგანიზმსაც, რომელსაც რომელიმე ქრონიკული დაავადება აქვს, მაგალითად, დიაბეტი ან ღვიძლის დაავადება. ხანდაზმულებიც რისკ-ჯგუფს შეადგენენ.
თუ ჯანმრთელი ზრდასრული ბრძანდებით, B ჯგუფის სტრეპტოკოკი ვერაფერს დაგაკლებთ. ორსულებში მესამე ტრიმესტრში ტარდება სპეციალური სკრინინგ ტესტი - B ჯგუფის სტრეპტოკოკის არსებობის შემთხვევაში, ანტიბიოტიკური თერაპია მშობიარობის დროს პატარას ინფექციისგან დაიცავს.
სიმპტომები
ჩვილები
მიუხედავად იმისა, რომ დედას B ჯგუფის სტრეპტოკოკი აქვს, ჩვილების უმეტესობა ჯანმრთელი იბადება და მხოლოდ მცირე ნაწილი ავადდება. თუმცა იმ ჩვილების ჯანმრთელობის მდგომარეობა, რომლებიც B ჯგუფის სტრეპტოკოკით მშობიარობის პროცესში ინფიცირდებიან, შესაძლოა გამწვავდეს.
აგრეთვე ინფექცია შესაძლოა განვითარდეს როგორც ადრე, ისე გვიან, მაგალითად, პატარა დაინფიცირდეს დაბადებიდან 6 საათში ან დაბადებიდან რამდენიმე კვირისა თუ თვის შემდეგ.
ვლინდება შემდეგი ნიშნები თუ სიმპტომები:
- სიცხე;
- კვების გაძნელება;
- ენერგიის ნაკლებობა;
- სუნთქვის გაძნელება;
- გაღიზიანება;
- სიყვითლე.
ზრდასრულები
ბევრი ზრდასრული B ჯგუფის სტრეპტოკოკს ატარებს კუჭ-ნაწლავში, ვაგინაში, სწორ ნაწლავში, შარდის ბუშტსა თუ ყელში.
როგორც წესი, არ ვლინდება სიმპტომები ან ნიშნები.
ზოგიერთ კლინიკურ შემთხვევაში B ჯგუფის სტრეპტოკოკმა შესაძლოა გამოიწვიოს საშარდე ტრაქტის ან სისხლის ინფექცია, ან პნევმონია.
გამომწვევი მიზეზი
ბევრი ზრდასრულია B ჯგუფის სტრეპტოკოკის მატარებელი. შესაძლოა ბაქტერიის მატარებელი იყოთ მცირე დროით ან ყოველთვის, ან ბაქტერია ზოგჯერ ჩნდებოდეს და შემდეგ ისევ ლაგდებოდეს.
აღსანიშნავია, რომ B ჯგუფის სტრეპტოკოკის ბაქტერია არ გადადის სქესობრივი გზით, საკვებით და წყლით.
ვაგინალური მშობიარობის დროს ინფიცირება შესაძლოა მოხდეს მაშინ თუ პატარა გადაყლაპავს B ჯგუფის სტრეპტოკოკის შემცველ სითხეს.
წყარო:
https://www.mayoclinic.org/diseases-conditions/group-b-strep/symptoms-causes/syc-20351729
