როგორც ამბობენ, ენერგიულ ადამიანს მთის დალაშქვრა შეუძლია, თუმცა დაღლილი ლოგინიდან ადგომისთვის ძალას ვერ პოულობს.
ალბათ ცხოვრებაში ერთხელ მაინც გქონიათ ისეთი შეგრძნება, როცა დაღლილობის გამო ვერაფერი გააკეთეთ - სისუსტე, ენერგიის არქონა, გადაქანცვა, გამოფიტვა, ამ და სხვა სიტყვებით აღწერენ ადამიანები დაღლას.
დაღლილობა არ არის მხოლოდ ძილიანობა და მოიცავს არაერთ ფიზიკურ, ემოციურ თუ მენტალურ კომპონენტს.
დაღლილობა ყალიბდება როგორც ყოფითი მიზეზების, ისე ჯანმრთელობის პრობლემის გამო. თუ მუდმივად უჩივით უენერგიობას და მიზეზს ვერაფერს უკავშირებთ, აუცილებლად გაიარეთ ექიმის კონსულტაცია.
ჯანმრთელობის პრობლემის ფონზე ჩამოყალიბებული დაღლილობის მკურნალობა შეუძლია მხოლოდ ექიმს, თუმცა ყოველდღიური ცხოვრებისეული მიზეზებით განპირობებული გადაღლილობის მართვაში ეს რეკომენდაციები დაგეხმარებათ.
რეკომენდებულია:
- ივარჯიშეთ. ვარჯიშისას უჯრედები ენერგიით მარაგდება, ორგანიზმში ჟანგბადის მიწოდების პროცესი უმჯობესდება. ვარჯიშისას გამომუშავდება ბედნიერების ჰორმონები, გავიწყდებათ (დროებით მაინც) უარყოფითი ემოციები;
- ენერგიისთვის უნდა ჭამოთ. რასაკვირველია, რაციონი უნდა შედგებოდეს ჯანსაღი პროდუქტებისგან;
- თუ ენერგიის წყაროს კოფეინში ხედავთ, უძილობა გარანტირებული გაქვთ. დიახ, ერთი ჭიქა ყავა გემრიელიცაა და სხეულს აფხიზლებს, თუმცა დოზას ნუ გადააჭარბებთ. ასევე შუადღის შემდეგ ყავის მიღებას მოერიდეთ, რადგან კოფეინი ორგანიზმიდან გამოდევნას ვერ მოასწრებს, ანუ ღამით არ დაგეძინებათ;
- მაქსიმალურად შეზღუდეთ ალკოჰოლი;
- დაღლილობის მიზეზი ხშირად არის გაუწყლოება. დღის განმავლობაში უნდა დალიოთ წყალი, რამდენჯერმე;
- ზედმეტს საკუთარ თავზე ნუ აიღებთ - ეს რჩევა ეხება როგორც სამსახურში, ისე ოჯახში დაკისრებულ მოვალეობას. მოუსმინეთ ორგანიზმს და ზედმეტად ნუ გადაიტვირთავთ თავს. ასევე არ მოგერიდოთ დახმარების თხოვნა, თუ სიტუაცია მოითხოვს;
- შეძლებისდაგვარად მოერიდეთ სტრესულ გარემოს.
წყარო:
